Blog dedicado as actividades que realiza a oficina medioambiental da Universidad da Coruña

CRÓNICA DO PROXECTO RÍOS PRIMAVERA

O pasado mércores 6 de Abril a Oficina de Medio Ambiente da UDC en colaboración con ADEGA organizaron a inspección de primavera do Proxecto Ríos, que tivo lugar no río Lagar no treito que pasa enfronte da Fac. Económicas da UDC.
O Proxecto Ríos é unha iniciativa de concienciación, educación e participación cidadá na defensa dos ríos galegos, baséase na inspección do estado dos ríos por parte de persoas voluntarias que a realizarán dúas veces ao ano: campaña de outono e de primavera. O obxectivo final destes grupos de voluntariado é facerse responsábeis da vixilancia do río que pasa polo seu municipio ou localidade.
Máis información en: www.proxectorios.org
Igual que na campaña de outono, tamén contamos coa colaboración de Paco Bañobre, da asociación ecoloxista  ADEGA e coordinador de grupos do Proxecto Ríos, que nos explicou o Proxecto e os criterios para analizar a calidade dos ríos. Os participantes fomos cubrindo a folla de inspección onde se responde a preguntas sobre parámetros físicos (como o caudal do río, presenza de rápidos...), químicos (pH, osíxeno disolvido, nitratos...) e biolóxicos (bosque de ribeira, macroinvertebrados...)
Os macroinvertebrados son bioindicadores de calidade das augas, que tomamos como referencia para adxudicar un índice de calidade a este treito do río Lagar. Nesta campaña atopamos menor cantidade de invertebrados, iso pode ser debido a que nesta época a maior parte deixan a súa fase larvaria e pasan a convertérense en adultos, por iso se realizan os estudos en outono e primavera. Coa axuda de Paco Bañobre e das fichas, puidemos identificar, entre outras, diferentes especies de libelúlidos e de ganmáridos, especies que indican unha Calidade Moderada do río, ao igual que se obtivo na campaña de outono.
Entre os parámetros físico – químicos obtivemos pH en torno a 7, que é pH neutro óptimo para a vida, e Tª de 15ºC, un pouco alta para os ríos galegos, que adoita atoparse sobre os 13ºC, isto pode ser debido a que nos atopamos nun treito de río urbano, moi recollido, tanto polos edificios como polo microclima creado.
Visita o noso Facebook onde atoparás o álbum fotográfico da xornada.

Para coñecer e anotarte en outras actividades da OMA, faite seguidor do noso Facebook, Twitter  e visita o noso Blog medioambienteudc.blogspot.com.es.

Share on Google Plus

0 comentarios: