O día 29
de Abril tivo lugar no río Lagar, no treito situado entre o Edificio de
Servizos Centrais de Investigacións e a Facultade de Economía e Empresa, no
campus de Elviña, a inspección de Primavera do Proxecto Ríos, organizada
pola Oficina de Medio Ambiente en colaboración con ADEGA.
O
Proxecto Ríos é unha iniciativa de concienciación, educación e participación
cidadá en defensa dos ríos de Galiza. Fundaméntase na realización de
inspeccións do estado dos ríos por parte de persoas ou grupos voluntarios a
nivel local, co obxectivo final de facerse responsábeis da vixilancia do río
que pasa polo seu municipio ou localidade.
Máis información en: www.proxectorios.org
A
inspección do río Lagar foi dirixida por Paco Bañobre (ADEGA) e os criterios
analizados e os resultados obtidos da inspección foron os seguintes:
A
calidade hidromorfolóxica: baséase na observación do bosque de ribeira, da presenza
de rápidos ou augas estancas… Este treito caracterízase por ser unha zona cunha
forte presión antrópica, pois está no medio do campus rodeado de construcións,
e por continuar o seu curso canalizado pasando a zona do campus. A auga flúe
durante todo o ano e está totalmente sombreado ao estar rodeado de vexetación.
O substrato do fondo do río está composto maioritariamente por areas, limos e
arxilas, todos eles sedimentos finos. En canto á calidade físico-química o que se fixo
foi medir o pH, neste caso era de 6, a concentración de nitratos (5mg/l), a
temperatura da auga (15ºC), o osíxeno disolto (4mg/l) e a transparencia. Todos
estes parámetros deron resultados normais tendo en conta as características do
río, da zona na que se atopa e da época
do ano, aínda que a temperatura deste é un pouco alta.
A calidade
biolóxica constátase a través duns índices de biodiversidade para o que é
necesaria unha identificación dos macroinvertebrados presentes no punto de
mostraxe. Estas organismos son bioindicadores da calidade da auga, cada familia
ten asignada unha calidade dependendo dos seus requirimentos para o seu
desenvolvemento e supervivencia. O resultado do índice de macroinvertebrados
apunta cara unha calidade moderada do río. Os organismos máis abundantes
corresponden aos Gammaridae, unha familia de crustáceos de augas doces. Dentro
da familia dos dípteros observamos especies da familia Simuliidae, tricópteros
da familia Hydropsychidae, efemerópteros da fam. Baetidae, ademais tamén nos
atopamos na mostraxe unha gran cantidade de planarias, moluscos da familia Hydrobiidae e larvas de odonatos
da familia Libellulidae.
Dentro da
biodiversidade de flora abondan plantas como o pé de boi ou os ameneiros, no
entorno do río. A cobertura das plantas acuáticas no río supera o 50%, mentres
que a de musgos, algas filamentosas e algas adheridas ás pedras non supera o
5%.
Para
obter todos estes datos vaise cubrindo unha ficha, que por se tedes curiosidade
podedes ver en:
Máis fotos da actividade
en:
Podes
atoparnos en:
Facebook: Oficina de Medio Ambiente UDC
Twitter:
https://twitter.com/OMA_UDC
0 comentarios:
Publicar un comentario