Crónica reforestación participativa do Monte da Fraga e restauración da charca
No marco do día da árbore e da auga, o 19 de marzo, dentro do proxecto de restauración participativa do Monte da Fraga a Oficina de Medio Ambiente da UDC coa colaboración da Asociación Ecoloxista ADEGA organizou unha plantación onde se plantaron especies autóctonas nunha área situada entre as facultades de Filoloxía e de Ciencias, na Zapateira.
O espazo escollido estaba antigamente
ocupado por eucaliptos de gran porte que foron cortados en cursos anteriores por
mor dos problemas de seguridade para as persoas e as instalacións. Hoxe continúase
co seu control para evitar o rebrote e coas actividades de reforestación.
No proxecto establecéronse tres
áreas diferenciadas con diferentes especies segundo o uso que se vai a dar a
cada unha das zonas. Procedeuse a crear un corredor de carballos tanto
autóctonos como americanos (Quercus robur
e Quercus rubra) e castiñeiros (Castanea sativa) a carón do camiño que
une ciencias con filoloxía. Estes exemplares foron sementados na pasada
temporada e teñen un porte de entre 20-50 cm. Plantáronse no mesmo buraco entre
2-4 exemplares coa intención de cubrir a posible mortalidade.
Na zona superior da área a
reforestar, ao lado da estrada, iniciouse a creación de sebes coa intención de
que ao medrar, illen todo este espazo do
ruído dos coches, en particular a zona da charca situada inmediatamente por
baixo. Nesta zona podemos atopar exemplares de acivro (Ilex aquifolium), loureiro común (Laurus nobilis) e laureiro
real (Prunus laurocerasus).
A última zona na que se procedeu
a reforestar é a situada por baixo da charca e nela podemos atopar cerdeiras (Prunus sp.) e érbedos (Arbutus unedo), árbores moi valoradas
por diferentes especies animais debido aos seus froitos.
Tamén, enmarcada neste proxecto desenvolveuse
a restauración da Charca. A charca da UDC creouse en abril de 2013, nunha das
actividades de voluntariado organizadas pola OMA en colaboración con Charcas
con Vida. Esta charca está impermeabilizada cunha lona EPDM, e ten un tamaño
aproximado de 8 m x 3 m. A auga da charca é de orixe natural e estacional (chuvia),
polo que no verán adoita secar. Dita charca forma parte do proxecto de restauración do Monte
da Fraga no campus da Zapateira. Para a charca, recolléronse especies vexetais
no humidal para depuración existente no Campus da Zapateira: espadanas (Typha latifolia), xuncos (Juncus sp.) e lirios (Iris pseudacorus). As plantas
colocáronse arredor da charca, e tamén dentro nunhas macetas de barro. Ao redor
tamén se fixo un estaquillado de especies autóctonas como salgueiros (Salix sp.), bidueiros (Betula alba) e sabugueiros (Sambucus nigra).
Tamén se recolleu lixo que había
dentro da charca, probablemente levado polo vento desde as áreas próximas.
Despois das labores de plantación
procedeuse a colocación dunha malla vexetal nalgunhas partes nas que se podía ver a lona impermeable. Deste xeito creouse un substrato que axuda a revexetar
as beiras da charca.
As árbores usadas na
reforestación foron doadas tanto por particulares como pola propia Facultade de
Ciencias, a quen lle agradecemos sinceramente o apoio.
Grazas ademais a todas as persoas voluntarias que participaron nesta actividade!!
Podedes ver as fotos da actividade na nosa páxina de facebook Oficina de Medio Ambiente UDC no álbum Restauración Participativa no Monte da Fraga.
0 comentarios:
Publicar un comentario