Blog dedicado as actividades que realiza a oficina medioambiental da Universidad da Coruña

Crónica Construción da charca do Monte da Fraga

            O pasado mércores 22 de maio tivo lugar no monte da Fraga (Campus da Zapateira) a sexta actividade da III Edición da Primavera Ambiental da UDC, un ciclo de conferencias e obradoiros organizados pola Oficina de Medio Ambiente en colaboración con ADEGA. Celebramos o Día Mundial da Biodiversidade construíndo unha charca no monte da Fraga co obxectivo de naturalizar este espazo fortemente castigado por presións antrópicas.
 
Ás 10:30h reunímonos no salón de actos da Facultade de Ciencias, onde Pedro Galán, herpetólogo e profesor da UDC, fixo unha pequena presentación sobre os diversos tipos de charcas que existen e as súas principais ameazas. Tamén falou do declive que sofren as poboacións de anfibios a nivel mundial. Seguidamente, Lucía Parente, educadora ambiental da asociación ecoloxista ADEGA, explicounos en qué consiste o proxecto Charcas con Vida. Esta nova iniciativa nace con tres liñas de actuación fundamentais: a divulgación da importancia dos valores das charcas, a creación dunha rede cidadá para o inventariado e estudo das charcas e a promoción de actuacións de construción e recuperación de charcas mediante acordos de custodia do territorio e voluntariado ambiental.
 
            Despois dunha pequena rolda de preguntas por parte dos voluntarios e voluntarias trasladámonos ao monte da Fraga para comezar a xornada de traballo. Alí, una pequena escavadora axudounos a retirar as pedras máis grandes e iniciar a escavación para despois poñernos mans á obra e facer a nosa charca. A charca creada ten unhas dimensións de 7 metros de longo por 3,5 metros de largo. Con ferramentas habituais (pás, sachos, pisóns…) deixamos o buraco feito para acto seguido proceder a impermeabilizar a charca. Para isto  colocamos unha cama de palla para evitar a rotura da lona  e por riba unha lona plástica.

Ao mediodía paramos un anaquiño para tomar o xantar con produtos ecolóxicos e de comercio xusto.  

 
Despois do descanso volvemos ao traballo. Xa só nos quedaba rematar a charca, así que unha vez colocada a lona cubriuse o fondo e os laterais con terra e puxéronse pedras nos bordes para suxeitar o terreo. Tan só falta agardar a que veña a choiva para que se encha de auga e nos poidan visitar os primeiros habitantes!

As charcas son pequenos ecosistemas cun gran valor ecolóxico, porén apenas teñen sido obxecto de iniciativas para o seu estudo e conservación en Galiza. A desaparición destes lugares contribúe ao empobrecemento da nosa paisaxe, á extinción de comunidades de flora e fauna, e á perda dos beneficios que nos ofrecen os ecosistemas. É por iso que con esta actuación pretendemos difundir a importancia das charcas e favorecer a biodiversidade na zona do monte da Fraga, un espazo anteriormente ateigado de eucaliptos, especie exótica invasora, que impediron a proliferación de moitas outras especies.

Podedes visitar as fotos realizadas durante a actividade na nosa páxina de Facebook "Oficina de Medio Ambiente UDC" ou no seguinte enlace: Album web de la OMA#
Share on Google Plus

0 comentarios: