Ciclo de documentais socio-ambientais
Datas: Días 1, 3, 8 e 10 de abril ás 17.00h
No mes de abril
organizamos un ciclo de documentais de temática socio-ambiental na facultade de
Socioloxía. Componse de catro xornadas, e en cada unha haberá a proxección dun
documental e un posterior debate ou coloquio. Este ciclo pretende ser un espazo
para o coñecemento e reflexión de diferentes problemáticas ambientais e sociais.
Falaremos de temas como os transxénicos, consumismo, privatización da auga
potable, sobre-explotación e esgotamento de recursos.
Intentaremos
comprender as causas das problemáticas
sociais que nos afectan, e o máis importante, coñecer as alternativas e
solucións que podemos aportar de xeito persoal.
A primeira
proxección será o
martes 1 de abril Océanos un
documental con impactantes imaxes onde poderemos debater sobre a contaminación
no medio e a sobre-explotación dos recursos mariños.
Xoves 3 de abril proxectaremos Flow, polo amor da auga un documental que explica con detalle a ansia privatizadora do FMI e
varias das transnacionais máis poderosas dun ben común como é a auga, o recurso
máis valioso da terra.
Martes 8 de abril proxectaremos O mundo segundo Monsanto, documental que denuncia os
efectos negativos que provocan os produtos agroquímicos e as sementes de soia
transxénica que comercializa a empresa máis grande do sector, e expón a cara máis
escura da realidade agrícola de América do Norte e do Sur. No debate teremos a
sorte de contar con Marcial, representante da cooperativa de consumo Zocamiñoca
da Coruña onde nos exporá que outro xeito de consumo é posible e como podemos
participar nesta cooperativa.
Por último, o xoves 10 de abril pecharemos o ciclo
co documental O poder dos centros
comerciais, documental que analiza os recursos psicolóxicos utilizados nos
centros comerciais para atraer aos consumidores. Tras cincuenta anos de
existencia en moitos países, a cultura dos centros comerciais é xa un estilo de
vida. Esta é unha realidade moi próxima á cidade da Coruña. No debate poderemos
contar có profesor da facultade de socioloxía urbana Manuel García Docampo.
A asistencia a este
ciclo é libre ata completar o aforo do salón de actos da facultade de
Socioloxía. Dende a Oficina de Medio Ambiente vos animamos a participar neste
ciclo!!
Máis información:
Facebook: Oficina de Medio Ambiente UDC
Twitter: @OMA_UDC
0 comentarios:
Publicar un comentario