O pasado mércores 21 tivo lugar no edificio
Xoana Capdevielle un obradoiro de
libretas re-utilizando organizado pola OMA coa colaboración de ADEGA. O
obxectivo desta actividade é facer libretas a partir de papel utilizado soamente
por unha cara, que recollemos nos departamentos da Facultade de Ciencias. Trátase
principalmente de traballos do alumnado dos que aproveitamos absolutamente
todo, dende o papel até as tapas de plástico e as espirais para encadernar.
Este obradoiro está incluído dentro da Campaña re-utilizando da OMA co lema
“Se ten 2 caras, dálle 2 usos”, pola que pretendemos, mediante unhas caixas
instaladas en todas as facultades e escolas do campus, que a xente deixe o
papel usado só por unha cara, antes de botalo ao lixo, ou ben colla o papel que
outr@s deixaron para facer os seus apuntamentos, alongando a vida útil do papel.
O obradoiro comezou ás 17 horas cando nos
xuntamos o persoal bolseiro da OMA xunto cun grupo de 10 persoas e comezamos a
organizar a cadea de traballo. Un grupo desfacendo os traballos que recollemos,
unha persoa perforando o papel, unha persoa cortando o papel coa cizalla e o
resto facendo as libretas re-utilizando. O resultado foi unha morea de libretas
e cada participante puido levar a súa! De este xeito alongamos a vida útil do
papel, papel que ía destinado ao contedor do lixo, foi de novo aproveitado para
facer libretas de apuntamentos, cumprindo o principio de reutilización que é o
paso previo a reciclaxe.
Esta actividade está enmarcada dentro da Semana Europea de Prevención de Residuos.
Nesta semana o que se pretende é fomentar o acto de previr a produción de
residuos, é dicir, todo aquilo que se poida e deba facer antes de eliminar un
produto para reducir os volumes de recollida de residuos e a nocividade dos
residuos xerados. Tamén se inclúe nesta proposta a preparación para a
reutilización, que son as operacións que permiten reutilizar un produto ou un
dos seus compoñentes que de outro xeito se converterían en residuos.
Aproveitamos o obradoiro para dar a coñecer
estas propostas a tódolos participantes que destacaron o bo ambiente que se
respirou durante a actividade así como o traballo en equipo.
Atoparedes máis
información e fotos da actividade nas seguintes
ligazóns:
0 comentarios:
Publicar un comentario