O pasado luns 22 de febreiro a Oficina de Medio Ambiente en participación
coa Asociación Ecoloxista ADEGA, levou a cabo unha xornada de poda
participativa no monte da fraga.
O Dr. Javier Cremades Ugarte (Profesor titular de botánica na UDC), deu
unha charla introdutoria das ideas chave sobre a poda no salón de actos da
facultade de Ciencias e posteriormente, saímos ao Monte da Fraga a poñernos
mans á obra no obradoiro de poda e titorización de árbores froiteiras e
frondosas.
Na charla, Javier Cremades deu resposta a cuestións importantes sobre a
poda, entre elas:
Porqué podar? Principalmente pódase para eliminar ramas (danadas, enfermas,
etc.); modelar plantas, estimular o seu desenvolvemento e mellorar a súa produción.
Que plantas se podan? Isto depende do tipo de crecemento que exprese a
planta. Danse dous, monopódico (as ramificacións brotan dunha mesma xema
apical, un exemplo típico é o pino) e simpódico (as xemas sucédense unhas a
outras, neste caso o exemplo sería o carballo). As plantas con crecemento
monopódico pódanse moito menos que o simpódico e de xeito máis controlado.
Cando se podan? Depende de cal sexa a finalidade da poda. Normalmente faise
cando a planta se atopa en repouso vexetativo, cando o noso obxectivo sexa
modelar e estimular o desenvolvemento. E
pódase en calquera momento cando a poda se realiza para eliminar ramas danadas
e mellorar a produción. Tamén na poda se ten en conta a fase luar, sendo a
mellor a lúa minguante, cando a planta está menos activa.
Como podamos? O corte debe de ser nin demasiado cerca da xema nin demasiado
lonxe, e non debe de ser plano, senón con ángulo para que non se acumule auga.
Con que podamos? Con material axeitado, como serras, podóns, tesoiras de poda,
segundo o grosor das ramas a cortar, incluso motoserras. É importante que
estean limpas, afiadas e desinfectadas. Ademais é aconsellable poñer luvas. Ao
remate da poda utilízanse produtos cicatrizantes para protexer as feridas
feitas ás árbore.
A continuación, fomos ata o Monte da Fraga a
experimentar estas indicacións nós mesmos: Nunha primeira parada realizamos a
poda de unha parcela de frondosas (carballos e castiñeiros) que levaban
plantados desde os primeiros anos de reforestación do monte, e o obxectivo foi
darlle forma e clarear o terreo, para que as árbores medraran con máis forza.
Nunha segunda parada achegámonos á área onde se atopa a Charca, onde se
plantaron o ano pasado unha serie de cerdeiras, e tamén frondosas. Debido á
pendente dese terreo e ao efecto do vento, estas árbores estaban a medrar
retorcidas, polo que a actuación que fixemos eiqui foi dotalas de patróns para
guialas, así como limpar o alcorque e incluso transplantar algún carballo,
aproveitando para engadirlle compost como fertilizante das nosas áreas de
compostaxe.
Podes ver todas as fotos da xornada no noso facebook.
0 comentarios:
Publicar un comentario