O
pasado día 28 de abril a Oficina de Medio Ambiente da UDC xunto coa
Asociación Ecoloxista ADEGA celebramos o X Aniversario da
restauración do Monte da Fraga. Este espazo, situado entre as
facultades de Ciencias e Filoloxía (A Zapateira), era un eucaliptal
que foi tallado hai agora 10 anos para recuperar a fraga tradicional
do lugar, onde agora crecen máis dunha ducia de especies autóctonas
dos nosos bosques, repercutindo no aumento de biodiversidade vexetal
e animal.
Nesta
xornada de celebración tiveron lugar diferentes actividades:
Comezamos
pola mañá ás 12 horas, visitando unha exposición sobre Especies
Exóticas Invasoras (EEI) elaborada polo grupo de Bioloxía Costeira
(BIOCOST) da UDC, formado por paneis explicativos situados na Praza
da Fraga. A apertura de esta exposición foi presentada por Sergio
Roiloa, profesor de ecoloxía na facultade de ciencias da UDC, quen
nos deu unha interesante charla sobre a problemática da expansión
destas especies na conservación da biodiversidade autóctona. O
interese dos participantes propiciou o debate e intercambio de ideas
sobre o tema, no que Sergio e outras persoas asistentes con
coñecementos, solucionaron as dúbidas sobre as EEI en Galiza.
De
seguido, ás 13 h. tivo lugar o roteiro polo Monte da Fraga, a
segunda edición neste curso académico, e que foi guiado de novo por
Elvira Sahuquillo, profesora de botánica da Facultade de Ciencias da
UDC, que nesta ocasión se centrou máis na historia dos 10 anos de
evolución do monte. Durante o agradable paseo puidemos coñecer máis
a fondo esta iniciativa de restauración do monte, que comezou no ano
2006 coa tala dos eucaliptos que invadían a superficie. Despois de
reforestar, o avance da flora autóctona foi considerablemente rápido
neste espazo tan curto de tempo, contando hoxe en día cunha fraga na
que crecen as especies autóctonas máis representativas dos nosos
bosques.
Trala xornada de mañá, a OMA e ADEGA organizaron un picnic na Praza da Fraga que comezou ás 14 horas, onde disfrutamos de música e bailes tradicionais mentres descansamos comendo cos amigos. Non faltaron as tradicionais empanadas e as tortillas, e contamos cunha boa variedade de comida e postres caseiros grazas ás achegas dos participantes. A OMA agasallamos aos asistentes cunha chapa conmemorativa da xornada.
Pola
tarde, levamos a cabo a eliminación de Especies Exóticas Invasoras,
actividade que comezou cunha charla introdutoria a cargo de Paco
Bañobre (ADEGA), quen nos explicou a principal problemática das
EEI, que é a segunda causa da perda de biodiversidade no mundo (a
primeira é a destrución directa do hábitat), vimos que tipos de
especies invasoras hai en Galiza, as posibles causas e os pasos a
seguir para eliminalas. Xa con estes coñecementos, achegámonos ao
Monte da Fraga a facer o traballo de campo, onde se nos proporcionou
o material necesario e nos dividimos en dous grupos para eliminar
manchas de acacia negra, eucalipto e herba da pampa. Foi sobre esta
última sobre a que actuamos máis intensamente, obtendo seis sacos
de raíces ao final da xornada. Tanto os plumeiros como as raíces
desta planta foron retiradas máis tarde polos servizos de xardinería
da UDC, xa que debido á facilidade de enraizar de novo, o
aconsellable é a súa retirada.
A
xornada concluíu con éxito, nun día agradable soleado, tras ter
aprendido, festexado e traballado no Monte da Fraga.
Podes ver todas as fotos da xornada no noso facebook https://www.facebook.com/Oficina-de-Medio-Ambiente-UDC-
Para coñecer máis e anotarte nas actividades da OMA na UDC, síguenos no Facebook e Twitter, e tamén no noso Blog.
0 comentarios:
Publicar un comentario